وأدمــعت عــيون العــروس ..!

اليوم : السبت.. الموافق: 4-2-1432هـ ..


مممم .. مدري صراحة من وين أبدأ أدري إني أبطيت عليكم كثير لي فتره ما كتبت اي شئ ..
فاليوم حأكتب المواقف المضحكه والمهمه اللي حصلتلي خلال هذي الفتره اللي انقطعت فيها عن الكتابه ..


أبدأ من يوم الأربعاء الموافق: 23-1-1432هـ
الصبااح الجو كان روعه بمعنى الكلمه ..هواا يجنن وشوية برد والسماء مليااانه يووم تزنن ..




واحنا نازلين ع الفسحه قالتلنا ندى ترا اليوم جبت صحنين حلى وقهوه وكرواسون يعني فطور احسن من وجبات كاكو اليابسه أبو زيت وعصايرهم أبو مويه ولون 
طبعا طرنا فرحه عاد انا احب الحلى اللي تسويه مررره لزيييز 
نزلنا وتجمعنا احنا والبنات واكلنا .. وخلصنا اول صحن 
ثاني صحن قلت خلوه للصرفه ننقنق عليه  
قامت عهود سحبته تقول لاااا باخذه لبيت خالتي ومدري ايش 
طالعت فيها 
انقلعي منتي ماخذته لو تنطبق السما ع الارض قال تاخذينه قال 
المهم جلسنا في صياح الين طلعنا الفصل ..
الحصه الرابعه مرت بسلام ..
على نهاية الخامسه تدقني حنين وتقولي شوفي الشبابيك والله كأننا عصر 
طالعت لقيت الدنيا مغيييييمه
رجعت التفت للأبله ..
شويه ع السادسه بدايتها صارت الدنيا كأنها مغرب ..!!
شويتين وتصير الدنيا وكأننا في العشا  !!!!!!!!
دخلت علينا المديره والمرشده والمساعده وبعض من الابلات عشان يشوفون الفصول ويقيمونها ..
دخلوا وهرجوا وضيعوا لابلة الفيزيا حصتها 
بعد ما طلعوا جات ابلة الرياضيات تقول خلي البنات ينزلون خلاص انصراف فيه مطر ..
طبعا انا جاتني عقده من شئ اسمه مطر من العام
وصرت اخاف منه
لميت اغراضي ونزلت انا وحنين لتحت لقينا الدنيا امطااار وصواعق وبرووق 
منظر مرعب بالنسبه لي 
زمان منظر زي كذا نادر في جده ..
وكنت اتمنى انو ينزل امطار ونلعب تحتها زي ما سوو البنات ذاك اليوم ..
بس اللي صار على جده العام خلاني أكره المطر والبرق والرعد وصرت اتمنى تمر السنه من دون امطار ..
جلست افكر ايش اسوي الحين .؟؟!
فتحوا الباب اخرج ولا ما اخرج ؟!
بابا يستناني ولا لسا ما جاء؟!
عبير وافنان خرجوا من مدرستهم في الشارع يحسبون ان هذا موعد انصرافنا كل يوم ولا هم يعرفون ان الانصراف مبكر اليوم ؟
يا ربي .. 
لبست عبايتي بسرعه .. 
وخرجت من المدرسه اشوف البنات لا يكونون خرجوا .. 
المطر غرقني تماما 
غرق عبايتي وشنطتي وكتبي ..
الشوارع غرقت والمكاتب والزروع وكل شئ حولي غرق ..

وصلت لمحل ما يوقف بابا دايما وما لقيته ..
رحت لمدرسة البنات قلت لازم اروح لهم وانبههم ما يخرجون 
وما امدني ادخل ساحتهم الا البنات كلهم من اولى الى سادس بصوت وواحد يبكون 
لاحوول كلهم ازرق وين الاقي الثنتين ذولا الحين !!
وبعد محاولاتي جاهدة في البحث عنهم 
لقيتهم لاصقين في بعض ويبكووووون ودمووووع وشغلتهم شغله ..!! 
سحبتهم وقلتلهم اص انتي وهي ليه تبكون 
قربتهم جهة الباب وقلتلهم انا بخرج انتظر بابا برا لاني اعرفه ما راح يجي ينادي يستنانا احنا نخرجله
وانا في الشارع ضربة اول صاعقه من قوتها حسيت توازني اختل لصقت في الجدار واستندت عليه شويه
الين ما استوعبت اللي صاار كانت وقتها في وسط السما خط كبير ابيض متعرج وكأن السما وقتها انشقت نصين 
وصار ما حولها لونه اصفر وبرتقالي للحظات .. ورجعت الدنيا سودا زي ما كانت ..
انتظرت ابوي الين جا 
رجعت ناديت البنات وركبنا السياره الساعه 12 وما وصلنا البيت الا الساعه 1 ونص من زحمة السيارات والشوارع تقفلت
وهذا واحنا رايحين بيتنا اللي كلها خمس دقايق ونوصل ..!
وصلت غيرت ملابسي وتروشت وتغديت ورحت انام ما قدرت انام احس الم في اذني وتوتر وقلق اتوقع في اي لحظه يقولون سيل ..
تقلبت ع الفراش ساعتين ..
وبعدها قمت فتحت النت ع اليوتيوب والناس ما شاء الله ما تقصر خلال الساعتين امتلا اليوتيوب بالمقاطع عن مطر جده ..
اذن العصر وبعدها جات عمتي فتو وبعدها كمان بنص ساعه جات عمتي زااازووو  وقضيناها سواليف وضحك ..
" على فكره" 
بخصوص الحلى في النهايه لا أنا ولا عهود اخذناه من الخوف والربشه  
...
ثاني يوم .. وهو الخميس ..
صحيت الصبح بدري الدنيا شبه ظلام ..
وغبار برا رحت فتحت بلكونة المجلس عشان استوعب شكل الجو والهوا وقتها 
مدري للحظه ..حسيت اني اشوف شاشه قديمه او فلم ابيض واسود مشوش ..! 
قفلت الشبابيك والبلكونات .. 
على الساعه 11 ويبدأ الجو في دقايق ينقلب 180 درجه .. تجمعت الغيوم السودااا وبدأ المطر والصواعق 
فيصل لصق في امي وما عاد رضي يتحرك ..
حتى هو المسكين متأثر مرره باللي صار العام وكان يقول خلاص متى يوقف ما نبغى مطر ..
وش ذنب هالصغير صار يكره المطر 
حسبي الله ونعم الوكيل على من كان السبب في اللي صار لك يا جده 
كنت ابغى اصور انا وعبدالله المطر رحت ركض اجيب الكام تبعتي على اساس انو عبدالله بيصور بالجوال وطبعا ما راح يقدر 
مافي غير كاميرتي 
لكن هيهاات هيهاات .. إن امي بالمرصاد 
نشبتلي في حلقي تقول لا تصورون ولا تفتحون شبابيك 
والصواعق بتشويكم ومن ذا الكلام .. ضاع علي تصوير الاحداث للاسف 
وبعد ما هدأ المطر وروقت الدنيا طفي الكهرب 
طلعنا السطح احنا وجيراننا نشوف الشمس لما طلعت من بين الغيوم ..
وعلى العصر بدأت الاخبار تشتغل وجانا خبر سيول منطقة ام الخير ..
وكالعاده المسبحين اللي قدام بيتنا امتلو مويه ..قصدي النفقين ..
واسعافااات ومرور ودفاع مدني ..
وازعاج استمر بالايام .. 
وهكذا ستظل جده كل سنه تستقبل شتائها ..~
.
.
.
طولت وابغى انام ان شاء ربي راح أكمل بعض مواقفي المضحكه مع البنات بكرا
أشوفكم على خير في أمان الله